சிதறல்கள்

எந்த சூழலிலும் சபரிமலைக்கான தனிதன்மையினை விட்டு கொடுக்கமாட்டோம் என வீதிக்கு போராட வந்திருக்கின்றார்கள், அலை அலையாக திரள்கின்றார்கள்

உண்மையில் தலைவர் என்றோ, போராட்ட குழு என்றோ இல்லை தூண்டிவிடும் சக்தி என்றோ எதுவுமில்லை. நிச்சயம் தன்னிச்சையான எழுச்சி. தங்களின் மிக உயர்ந்த பாரம்பரிய ஆலயத்தின் தனிதன்மையினை காத்தே தீரவேண்டும் எனும் எழுச்சி

பெண்கள் சபரிமலைக்கு செல்லலாம் எனும் தீர்ப்புக்கு எதிராக பெண்களே நாங்கள் செல்லமாட்டோம் இதர பெண்களை அனுமதிக்கவும் மாட்டோம் என தீர்க்கமாக சொல்லி நிற்கும்பொழுது சகல பக்கமும் அதிர்ச்சி பார்வைகள்

எம்மை பொறுத்தவரை அவர்களின் போராட்டம் மிக சரி, நல்ல இந்துபெண்கள் எதை செய்யவேண்டுமோ அதை மிக சரியாக செய்கின்றார்கள்.

பந்தளமன்னரும் போராட்ட குழுவினரும் அரசின் பேச்சுவார்த்தை அழைப்பினை ஏறேடுத்தும் பார்க்காத நிலையில் விஷயம் விஸ்வரூபமாகின்றது

கம்யூனிச அரசை தேர்ந்தெடுத்த மலையாளிகள்தான் கோவில் விஷயத்தில் இவ்வளவு ஆக்ரோஷமாகவும் நிற்கின்றார்கள்

கேரள அரசு திகைத்து நிற்கின்றது, நிச்சயம் அதற்கு மிக சவாலான காலம். உச்சநீதிமன்ற தீர்ப்பினை அங்கு அமுல்படுத்துவது முடியாத விஷயம் என உணர்ந்தே விட்டது

இது எளிதில் தீரும் பிரச்சினை அல்ல, சபரிமலை விவகாரத்தில் பழைய நிலை திரும்பும் வரை நிலமை சுமூகம் அல்ல‌

ஜல்லிகட்டுக்காக தமிழகம் பொங்கியது போல சபரிமலையினை காப்போம் என அவர்கள் கடும் முழக்கத்துடன் கிளம்பியிருக்கின்றார்கள்

கேரளம் ஆணும் பெண்ணுமாக கொந்தளித்து நிற்கும் நிலையில் தமிழகத்தில் சத்தமே இல்லை

ஒருவேளை தமிழக அய்யப்ப பக்தர்கள் ஜோடியாக செல்ல கடும் ஆவலில் இருக்கின்றார்களோ என்னமோ என மலையாளிகள் சந்தேகித்து கொண்டிருக்கின்றார்கள்.

தமிழக பக்தர்களுக்கு வீட்டில் மனைவிமார்களால் அவ்வளவு நெருக்கடியோ என்னமோ? இருக்கலாம், போனால் என்னையும் சேர்த்து அழைத்துகொண்டு செல்லவேண்டும் என மனைவியர் அப்படி மிரட்டி இருக்கலாம்

எப்படியோ ஒரு எதிர்ப்பும் காட்டாத தமிழக பக்தர்கள் இனி சபரிமலைக்கு செல்லும்பொழுது எந்த முகத்துடன் மலையாள பக்தர்களின் முகங்களை ஏறெடுப்பார்களோ தெரியாது

தலைக்கு இருமுடி போல, முகத்திற்கும் சில முடிச்சுகள் கட்டி மறைத்து கொள்ளாமல் தமிழக பக்தர்கள் இனி சபரிமலைக்கு செல்வது சாத்தியமில்லை

[ October 8, 2018 ]