அழகிரி என்பவர் தலைவன் இல்லா குட்டி சாத்தான்
குட்டி சாத்தான்களுக்கு எப்பொழுதும் வேலை கொடுத்து கொண்டே இருக்க வேண்டுமாம், இல்லை என்றால் அதன் அட்டகாசம் பெருகிவிடுமாம்
இதனால் மந்திரவாதி அதற்கொரு வேலையினை கட்டளை இட்டுகொண்டே இருப்பானாம், இல்லை என்றால் அது மந்திரவாதியின் காதை திருகுமாம், தலையில் ஏறி இருந்து கடிக்குமாம், இன்னும் ஏக அழிச்சாட்டியம் செய்யுமாம்
இது மந்திரத்திற்கு மட்டுமல்ல அரசியலுக்கும் பொருந்தும்
தனக்கு அப்படி அட்டகாசம் செய்துகொண்டிருந்த அழகிரிக்கு வேலை மேல் வேலை கொடுத்து திசை திருப்பி விட்டிருந்தார் கலைஞர்
ஆனால் தனக்கு தேவையான நேரங்களில் அழகிரியினை அழைக்கவும் அவர் தயங்கவில்லை,
அழகிரியின் வெற்றி நேரங்களில் கிடைத்தற்கரிய மத்திய மந்திரி பதவியினையும் அழகிரிக்கு பலி கொடுக்க அவர் யோசிக்கவில்லை
இப்படியாக தேவைக்கு அழைப்பதும் பின் அழகிரி முரண்டு பிடித்தால் அவருக்கு கனத்த வேலை கொடுப்பதுமாக மந்திர அரசியல் செய்தார் கலைஞர்
கடந்த தேர்தலில் அழகிரி மறுபடியும் வந்து கலைஞருக்கு நெருக்கடி கொடுத்தபொழுது அட்டகாசமான வேலையினை கொடுத்தார்
அதாவது குட்டிசாத்தானிடம் மலையினை இழுத்தும் வரும் பொறுப்பு போன்றது, மலை வராது என தெரிந்தாலும் குட்டி சாத்தானை திசை திருப்பிவிடலாம், மலை வராத பட்சத்தில் இதெல்லாம் கூட செய்ய தெரியாத நீ சாத்தானா? என விரட்டி அடிக்கலாம்
பலன் எப்படி இருந்தாலும் லாபம்
அப்படி விஜயகாந்தினை இழுத்து வந்து உன் சாமார்த்தியத்தை காட்டு, இதோ உனக்கு அக்கினி பரீட்சை என விரட்டிவிட்டார் கலைஞர்
விஜயகாந்தோ வைகோ ஏற்றிவிட்ட முதல்வர் போதையில் மல்லாக்க கனவில் கிடந்தார், அழகிரியிடம் முடிந்தால் என்னை பிரதமராக்க முடியுமா? என கலைஞரிடம் கேளுங்கள் என்ற அளவில் கற்பனைகளில் சஞ்சரித்தார்
அதன் பின் நடந்தது நாடறியும்
அந்த தோல்விக்கு பின் அழகிரியால் ஒன்றும் சொல்ல முடியவில்லை, எது பேசினாலும் உன் பொறுப்பினை சரியாக செய்தாயா? என்ற சீறலே கலைஞரிடம் இருந்து வந்தது
ஒருவேளை வென்றிருந்தால் ஏதாவது பதவி கொடுத்து சரிகட்டி இருப்பார், பின் உரிய வேலைக்கு அனுப்பி இருப்பார்
தன் பக்கம் வராமல் பார்த்துகொள்வார்,
இப்படி பெரும் வேலை கொடுத்து திருப்பி விடாவிட்டால் அழகிரி வந்து எனக்கொரு முடிவு சொல்லுங்கள் என கலைஞரின் பேனாவினை பிடுங்கி மறித்து நிற்பார்
அழகிரிக்கு வேலை கொடுத்துவிட்டு தன் போக்கில் தன் வேலைகளில் பிசியாக இருந்தார் கலைஞர்
அரசியலும் மந்திரவாதமும் வேறல்ல, குட்டி சாத்தான்களை இப்படி ஏதாவது ஒரு வகையில் வேலை கொடுத்து கொண்டே அது சரியாக செய்தால் அதற்கு பலி கொடுத்து கொண்டோ சரியாக செய்யாவிட்டால் விரட்டி கொண்டோதான் இருக்க வேண்டும்
அரசியல் மந்திரவாதியான கலைஞர் அதை அட்டகாசமாக செய்தார்
இப்பொழுதும் திமுகவில் பெரியவர்கள் உண்டு, அழகிரியினை பிடித்து ” தினகரனை இழுத்துவா, பன்னீரை இழுத்துவா, அட முடிந்தால் தமிழிசையினாவது கட்சி கடத்து, இடை தேர்தலில் எதிர்கட்சிகளை டெப்பாசிட் இழக்க செய், உன்னை நிரூபித்து கட்சிக்கு வலுசெர் பதவியினை பின்னர் பார்க்கலாம்” என அவரை ஏவி விடலாம்தான்
வெற்றி வந்தால் நல்லது, அழகிரி தன்னை நிரூபிக்காமல் போனால் இன்னும் நல்லது
அதனை செய்யாமல் அவரோடு மல்லுகட்டுகின்றனர், கொஞ்சமும் கலைஞர் எனும் அரசியல் மந்திரவாதி பாணி இல்லை
அழகிரி என்பவரோ தலைவன் இல்லா குட்டி சாத்தானாக என்ன செய்வது என தெரியாமல் சுற்றி வருகின்றார், யார் காதை பிடித்து கடித்து துப்ப போகின்றாரோ தெரியாது
அதற்குள் கலைஞர் வழியில் அவருக்கு மந்திரகட்டு போடுவது நல்லது
