சிதறல்கள்

உடன்பிறப்பே, பெரியார் அண்ணா தொடங்கி என் 80 வருட அரசியல் வாழ்வினை எண்ணி பார்க்கின்றேன். ஒன்றா இரண்டா நம்மை பற்றி எழுதினார்கள்?

சாதாரண விசாரணைக்குள், அதுவும் சர்காரியா நம்மீது குற்றம் இல்லை என சொன்னபின்பும் எப்படி எல்லாம் எழுதி குவித்தார்கள்?

தனிபட்ட முறையில் எனக்குத்தான் எத்தனை மனைவிமார்களை இப்பத்திரிகைகள் கட்டி வைத்தன, தசரதனை விட எனக்கு அதிக மனைவிகள் கணக்கினை அவை காட்டின‌

அதன் பின்னும் ஒன்றா இரண்டா? எழுதினால் ஏடு தாங்குமா?

எல்லோரையும் சாதாரண கண்ணாடியோடும், திமுக என்றால் மைக்ராஸ்கோப் எனப்படும் நுண்ணோக்கி மூலமும் பார்த்துகொண்டிருந்த உலகமிது

உதாரணத்திற்கு ஒன்றை சொல்கின்றேன், அந்த அலைகற்றை ஊழல் என ஒன்று வந்ததே நினைவிருக்கின்றதா?

எப்படி எல்லாம் எழுதினார்கள்? எண்ணி வைத்தால் சனிகிரகம் வரை நீளும் பணம் எல்லாம் நாம் சுருட்டினோம் என்றார்கள். உலகின் மிக பெரும் ஊழல் அதுதான் என்றார்கள்

கண்மணி ராசா கப்பல் கப்பலாய் கொண்டுவந்ததாகவும் நானும் கனிமொழியும் எண்ணமுடியாமல் எண்ணி உலக சொத்துக்களை எல்லாம் வாங்கியதாகவும் கதை அளந்தார்கள்

அன்றெல்லாம் எந்த பத்திரிகை எழுதவில்லை? எல்லோரும் எழுதினார்கள், அவரவர் கற்பனாசக்திக்கு எட்டியபடி எழுதினார்கள்

நாம் வழக்கு தொடுத்தோமா, சிறை வைத்தோமா? இல்லை மிரட்டினோமா? உன்னால் இத்தேசத்திற்கு ஆபத்து என சிரிக்காமல் சிறை எடுத்தோமா?

இல்லை, ஒருகாலுமில்லை

இன்று தம்பி கோப்பாலுக்காக முதல் குரல் நம் இயக்கத்தின் தலைவரிடம் இருந்து வந்திருக்கின்றது. அதை நினைத்து அண்ணாவோடு சேர்ந்து நானும் இந்த இடத்திலிருந்து மகிழ்கின்றேன் பெருமைபடுகின்றேன்

அதிகாரம் கையில் இருப்பவர்கள் எப்படி எல்லாம் ஆடுகின்றார்கள் என்பதையும், எத்தனையோ முறை அதிகாரம் கையில் இருந்தும் நாம் அமைதி காத்தோம் என்பனையும் தமிழகம் இந்நேரத்தில் நினைவு கூறல் வேண்டும், திமுகவின் மாண்பினையும் பத்திரிகை உலகிற்கு அது கொடுத்த சுதந்திரத்தினையும் இனியாகிலும் தமிழ் கூறும் நல்லுலகம் புரிந்திடல் வேண்டும்

தமிழகத்து பாட்டாளி முதல் பத்திரிகையாளர் குரல் வரை காக்கும் ஒரே இயக்கம் திமுக என்பதை தமிழர்கள் புரிந்துகொள்ளும் நேரமிது உடன்பிறப்பே

உன்னை போலவே, தமிழகமும் நம்மையும் நம் இயக்கத்தையும் முழுக்க புரிந்துகொள்ள, அதன் மூலம் தமிழர் நலனை காத்து நிற்க களத்தில் இச்செய்தி எல்லாம் கொண்டு சென்று பகைவிரட்டுவாய், இனம் காப்பாய் அடலேறே..”

[ October 9, 2018 ]