பிரபுதேவா!

அவருக்கு 47 வயதுதான் ஆகின்றது, பெரும் சாதனையாளர் என கொண்டாட இன்னும் காலமிருக்கின்றது

ஆனால் குறிப்பிட்டு சொல்லவேண்டியவர் அவர் மிகசிறு வயதில் இருந்தே சினிமாவுக்கு வந்து அதிலிருந்து பிரியாமல் அதில் கலந்து வரும் கமலஹாசன் போல அவரும் ஒருவர்

அவர் பிரபுதேவா

சந்திரபாபு தொடங்கி வைத்த ஒருவித மேற்கத்திய நடனத்தின் பின்னாளைய வாரிசு பிரபுதேவா

இவ்வளவுக்கு இவரின் தந்தை சுந்தரம் சந்திரபாபு ஆடுவது நடனமே அல்ல என விமர்சித்த காலமும் உண்டு ஆனால் இவரோ அவர் வழி வந்துவிட்டார்

சந்திரபாபு போலவே பன்முக திறமையாளர் பிரபுதேவா

நடனக்காரனாக தொடங்கி காமெடியன் நடிகர் இயக்குனர் என உயர்ந்தார், மும்பைக்கு சென்று இயக்குநராக அங்கும் வெற்றிகொடி நாட்டினார் பிரபுதேவா

ஒரு வகையில் கிட்டதட்ட 30 ஆண்டுகளாக தொடர்ந்து அட்டகாசமாக ஆடிவரும் அவரின் நடனமும் கவனிக்கதக்கது

அவரின் தொழில்பக்தியும் அக்கறையும் சொல்லதக்கது, 1990களில் ஆடிய அதே நடனத்தை இன்றும் அவரில் காணமுடியும் ஒரு பிசிறும் தடுமாற்றமும் காணமுடியாது, அதுதான் ஆச்சரியமானது

ஒருவகையில் மனிதர் அதிர்ஷ்டசாலி அவர் களத்திற்கு வரும்பொழுது ரஹ்மானின் யுகம் தொடங்கியது, மிக மிக அட்டகாசமான துள்ளிசை பாடல்கள் அப்பொழுது ரகுமானால் கொடுக்கபட்டது

அந்த வாய்ப்பினை மிக அழகாக பயன்படுத்தினார் அவர் அந்த இசைபிண்ணனிதான் அவரை தமிழ்நாட்டு மைக்கேல் ஜாக்சன் என கொண்டாட வைத்தது

இப்பொழுது 47 வயதினை கடந்தாலும் அவரின் உடல் அளவு அன்று பார்த்தது போன்றேதான் இன்றும் உள்ளது , ரஜினிகாந்த் போல இவருக்கு அது ஒரு வரம்

அரசியலில் அந்த உடல்வாகு வைகோ என்பவருக்கு கிடைத்தது

கிட்டதட்ட 30 ஆண்டுகளாக சினிமாவில் இணைந்தோடும் நதி என்பதால் சமீபத்தில் பத்மஸ்ரி விருது அவருக்கு வழங்கபட்டது

பிரபுதேவா தமிழ்சினிமாவில் தவிர்க்க முடியா நடன அடையாளம், அது இந்திய அடையாளமாகவும் மாறிவிட்டது

ஆடல் கலை அவருக்கு இயல்பாய் வந்தது, அது நிச்சயம் தெய்வத்தின் அருள். அதுவன்றி வேறல்ல.

தென்றலில் அசையும் நாற்று போலவும் அவரால் ஆடமுடியும், சூறாவளியில் சிக்கிய தென்னையின் அசைவிலும் அவரால் ஆடமுடியும், கடலின் அலை போலவும் ஆடமுடியும் , மானின் வேகத்திலும் ஆடமுடியும், மயிலின் நளினத்தையும் கொடுக்க முடியும்

சில வகை நடனங்கள் வாளை மீன்கள் நீந்துவது போல அவர் நடனம் அப்படி ஒரு லாவகம்..

கமலஹாசன் நல்ல நடன கலைஞர் ஆனால் அன்று ஆடியபடிதான் என்றும் ஆடுவார் மாற்றமென ஏதுமில்லை.

சந்திரபாபு, நாகேஷ் , ஆனந்த்பாபு என பலர் தொடர்ந்து நிலைக்க முடியா நடன உலகில் அவர் சிம்மாசனம் போட்டு அமர்ந்துவிட்டார் நிச்சயம் அது சாதனை

அதைவிட பெரும் சாதனை அவரை பார்த்து பல நடன கலைஞர்கள் வந்தனர், குறிப்பாக சாய் பல்லவி

அந்த அம்மணியின் நடனம் அவ்வளவு அழகானது, குஷ்புவின் கன்னம் போல தனித்துவம் வாய்ந்தது,

தலைவியின் கண்களுக்கும் சாய்பல்லவியின் நடனத்துக்கும் ஒரு வித்தியாசம் சொல்ல முடியும்?

இதைவிட என்ன பெருமை வேண்டும் அவருக்கு?

நல்ல கலைஞனாகிய பிரபுதேவா என்பவருக்கு இன்று பிறந்தநாள், கடந்த 32 ஆண்டுகளில் தனி முத்திரை பதித்தவர் அவர்..

அன்னார் இன்னும் பல வெற்றிகளை விருதுகளை பெற வாழ்த்துகள்..